Trump kritikon sulmin izraelit në Doha: Nuk jam i kënaqur me asnjë aspekt të tij

Presidenti i SHBA Donald Trump ka shprehur zemërim dhe zhgënjim të thellë pas sulmit izraelit në Doha, duke e quajtur situatën “shumë të pakënaqshme në çdo aspekt”.

 

Duke folur me gazetarët mbrëmjen e djeshme në Uashington, Trump deklaroi: “Nuk jam i kënaqur me të gjithë situatën. Nuk është një situatë e mirë, por do të them këtë – ne duam që pengjet të kthehen, por nuk jemi të kënaqur me mënyrën se si ndodhi sot.”

 

Ai shtoi më tej: “Nuk habitem kurrë nga asgjë, veçanërisht kur bëhet fjalë për Lindjen e Mesme.”

 

 

Më herët gjatë ditës, në një postim në rrjetin e tij social, Trump tha se vendimi për të ndërmarrë sulmin ishte marrë nga kryeministri izraelit Benjamin Netanyahu dhe jo prej tij.

 

Ai shtoi se në momentin kur administrata e tij ishte informuar nga ushtria amerikane, kishte qenë tepër vonë për ta ndaluar operacionin.

 

Presidenti theksoi se bombardimi i njëanshëm i Katarit – një vend që e përshkroi si “aleat të fortë dhe mik të Shteteve të Bashkuara” – nuk i shërbeu as interesave të Izraelit dhe as atyre të SHBA-së.

 

Në vijim, Trump bëri të ditur se kishte komunikuar me kryeministrin Netanyahu dhe Emirin e Katarit për t’i siguruar se një sulm i tillë nuk do të përsëritej në territorin e Katarit.