Trump-Netanyahu në Shtëpinë e Bardhë: Bisedime për Gazën, Iranin dhe tarifat e reja tregtare

Presidenti i Shteteve të Bashkuara, Donald Trump, priti të hënën në Shtëpinë e Bardhë kryeministrin izraelit Benjamin Netanyahu, ku të dy zhvilluan bisedime për luftën në Gaza dhe tensionet e fundit me Iranin.

 

Netanyahu deklaroi para gazetarëve se Izraeli po bashkëpunon me SHBA-në për të gjetur vende që janë të gatshme të pranojnë zhvendosjen e palestinezëve nga Gaza. Ndërkohë, i dërguari amerikan Steve Witkoff tha se mund të ketë bisedime me Iranin "shumë shpejt, brenda javës që vjen".

 

Takimi u mbyll me një darkë zyrtare në dhomën Blue Room të Shtëpisë së Bardhë, ku morën pjesë edhe anëtarë të administratës Trump. Gjatë eventit, Netanyahu i dorëzoi Trump një letër që ai i ka dërguar Komitetit të Çmimit Nobel, duke e propozuar presidentin amerikan për Çmimin Nobel për Paqen. “Është një nder i madh”, u shpreh Trump gjatë marrjes së letrës.

 

Në një tjetër zhvillim, administrata Trump ka shpallur një sërë tarifash të reja për më shumë se një duzinë vendesh, përfshirë Malajzinë, Afrikën e Jugut, Tajlandën, Tunizinë, Japoninë dhe Korenë e Jugut, me përqindje që variojnë nga 25% deri në 40%.

 

Trump ka kërcënuar gjithashtu se do të vendosë një tarifë shtesë prej 10% ndaj vendeve që ndjekin politikat “anti-amerikane” të aleancës ekonomike BRICS, e përbërë fillimisht nga Brazili, Rusia, India, Kina dhe Afrika e Jugut.

 

Në rrjetin e tij social Truth Social, Trump mbrojti ish-presidentin brazilian Jair Bolsonaro, i cili përballet me gjyq për një përpjekje për grusht shteti. “Ai nuk është fajtor për asgjë, përveçse që ka luftuar për POPULLIN”, shkroi Trump.