GJL e la në burg, Veliaj: Vendim zhgënjyes, do ndjek çdo rrugë ligjore

Kryetari i arrestuar i Bashkisë së Tiranës, Erion Veliaj, ka reaguar pas vendimit të djeshëm të Gjykatës së Lartë, e cila vendosi të lërë në fuqi masën e sigurisë “arrest me burg” ndaj tij.

 

Në një deklaratë të shpërndarë për mediat, Veliaj e cilëson vendimin si “jashtëzakonisht zhgënjyes”, ndërsa thekson se sot duhej të ishte më pranë rikthimit në familje.

 

“Vendimi i Gjykatës së Lartë është jashtëzakonisht zhgënjyes. Sot, unë duhet të isha një hap më pranë kthimit në shtëpi, pranë familjes sime. Por, në vend të kësaj, ndodhem i burgosur dhe në izolim në IEVP Durrës, në pamundësi për t’u takuar me këshilluesit e mi ligjorë ndërkombëtarë apo për të pasur informacionin e nevojshëm për të mbrojtur veten”, shprehet Veliaj.

 

Ai shton se nuk do të heqë dorë nga përpjekjet ligjore, me qëllim që të rifillojë detyrën si kryetar i Bashkisë së Tiranës.

 

“Unë do të vijoj të ndjek të gjitha rrugët ligjore në mënyrë që t’i shërbej përsëri Tiranës”, përfundon deklarata.

 

Deklarata e Veliajt vjen mes shqetësimeve të ngritura edhe nga avokatët e tij ndërkombëtarë, të cilët e konsiderojnë mbajtjen e tij në burg si të padrejtë dhe në kundërshtim me të drejtat ndërkombëtare.