Ilir Demalia në “Në Fokus”: Rrëfimi i jetës mes fëmijërisë, rebelimit dhe dosjeve të Sigurimit

I ftuar në emisionin “Në Fokus” në RTSH, analisti Ilir Demalia rrëfeu episode të rëndësishme nga jeta e tij, duke folur për formimin personal, karakterin rebel dhe ndikimin e fëmijërisë në personalitetin e tij. Ai u ndal edhe te përplasjet me sistemin komunist dhe mungesën e tolerancës në shoqërinë shqiptare për mendimin ndryshe.

Demalia u shpreh kritik ndaj gjuhës së urrejtjes që dominon në debatet politike, ku njerëzit shpesh sulmohen jo për idetë e tyre, por për simpati apo bindje personale. Sipas tij, kjo sjellje është një vazhdimësi e mentalitetit diktatorial.

Demalia foli edhe për “dosjet e Sigurimit”, duke ngritur pyetje mbi mënyrën se si po trajtohet kjo çështje dhe duke kërkuar transparencë të plotë për të kaluarën. Ai theksoi se drejtësia për të shkuarën duhet të vijë pa hakmarrje, por me ndershmëri dhe kurajë qytetare.

Në intervistë, Ilir Demalia foli edhe për librin e tij, të cilin e nis pikërisht me reflektime mbi vitet ’90 dhe pasojat e periudhës komuniste në ndërgjegjen kolektive. Ai nënvizoi se rruga më e efektshme për të shkatërruar një shoqëri është zhdukja e kujtesës historike dhe ndalimi i të kuptuarit të së kaluarës. Sipas tij, pa një përballje të ndershme me historinë, nuk mund të ketë as të tashme funksionale, e aq më pak të ardhme të shëndetshme për një vend.

Demalia vuri theksin te mungesa e katarsisit në shoqërinë shqiptare, veçanërisht mes elitave që dikur kanë qenë në shërbim të regjimit komunist. Ai përmendi se shumë prej tyre, përfshirë emra të njohur në politikë dhe media, nuk kanë kërkuar ndjesë publike dhe nuk janë përballur me të kaluarën e tyre. Përkundrazi, ata kanë ndërtuar mite dhe gënjeshtra të reja për të justifikuar veten, duke e bërë më të vështirë rindërtimin e së vërtetës historike. Në këtë kontekst, libri i tij vjen si një përpjekje për të filluar një reflektim të nevojshëm shoqëror dhe moral.

 

Për më tepër ndiqni intervistën e plotë: