Dash Sula: Rama është mjeshtër i politikës së ekuilibrave

Ilir Demalia nis diskutimin duke pyetur për marrëdhëniet e kryeministrit Rama me ndërkombëtarët. Dashnor Sula shprehet me sinqeritet:

 

“Rama për mua është i dështuar brenda Shqipërisë, por është i shkëlqyer me ndërkombëtarët,” – thotë ai, duke shtuar se kryeministri zotëron një aftësi politike të rrallë në ruajtjen e ekuilibrave pa përdorur dhunë apo metoda ekstreme.

 

Sula përshkruan më tej Ramën si “një mjeshtër me metodat e veta”, që di të ruajë stabilitetin politik dhe social në vend. Megjithatë, ai vë në dukje se kjo aftësi politike nuk përkthehet në rezultate pozitive për Shqipërinë në përgjithësi.

 

Në vijim, debate të ashpra u ngritën për çështjen e moralit në politikë dhe rolin e SPAK-ut në luftën kundër korrupsionit. Sula thekson:

 

“Unë kam folur vetëm një herë për bashkëshorten e Veliajt dhe kërkova falje për këtë, sepse nuk mund të them gjëra që nuk i di dhe që nuk janë të vërteta. Në politikë duhet të flasësh me parime, jo me thashetheme.”

 

Demalia e pyet lidhur me operacionin e SPAK-ut dhe arrestimet për kontrabandë cigare, ndërsa Sula refuzon të japë emra konkretë, duke nënvizuar mungesën e fakteve të sigurta:

“Unë nuk di kush është nipi apo dhëndri, nuk dëgjoj thashetheme. Përmendja e oligarkëve duhet të jetë me emra të qartë, jo të përgjithshëm.”

 

Deputeti vijon duke theksuar se politika ka krijuar një atmosferë ku bizneset e vogla janë të detyruara të lëvizin në një fushë të vështirë rregullash dhe “ajo që quhet oligarki” shpesh është një koncept i tejfryrë nga politika.

 

Dashnor Sula thekson distancën e tij nga çdo përfshirje personale apo favore politike, duke deklaruar:

“Nuk kam asgjë me Zamir Manën, Çat Kastratin apo Bashkim Ulen, sepse këta nuk ndikojnë direkt në politikë për të blerë deputetë apo favore. Nuk më ka dhënë askush litër naftë apo favor të tillë.”