Plas e qeshura në studio, Dash Sula: Basha nuk shkonte dot as në banjo pa e marrë vesh Berisha

Në emisionin “N’xhiro me Syçin” me Ilir Demalin, deputeti i Partisë Demokratike, Dashnor Sula, foli me kritika të forta për ish-kryetarin e PD-së, Lulzim Basha, dhe zhvillimet brenda partisë.

 

“Unë e kam thënë gjithmonë, edhe Bashës ia kam thënë, edhe medias, edhe Berishës dhe të gjithëve, Basha nuk ka qenë kurrë kryetar partie,” tha Sula duke e konsideruar atë thjesht “administrator e një shoqërie tregtare”. Sipas tij, Basha ka qenë “si administrator që rrëmben pak, por është i kënaqur dhe pronari është i lumtur sepse del me fitim”.

 

Ilir Demalia e pyeti nëse Basha kishte ndonjë rol vendimmarrës, ndërsa Sula iu përgjigj: “Ky ka qenë më shumë një fasadë, nuk ka marrë vendime me kokë të tij. Ndërkombëtarët takonin Berishën, ndërsa Basha nuk dinte të mbante konferencë për shtyp.”

 

Në diskutim doli edhe data 17 maji 2017, kur sipas Sulës, Basha “e ka shit partinë”, duke sjellë në vëmendje një situatë ku Basha “natën në shtëpi duhej të dilte në tualet për të urinuar”, si pasojë e stresit dhe presionit.

 

Sula gjithashtu tha se “ambasada amerikane dhe ndërkombëtarët, dy javë para zgjedhjeve, kishin informacion që Berisha dhe bashkëpuntorët e tij po përgatitnin qeverinë e re”, duke theksuar se PD-ja kishte qenë shumë pranë fitore në zgjedhjet e 2021-ës.

 

Në fjalën e tij, Sula theksoi edhe marrëveshjet e brendshme dhe marrëdhëniet me PS-në, duke shpjeguar se Basha “ka qenë vetë ai që ka bërë listat e kandidatëve, duke futur njerëz për kamuflim”.

 

Ilir Demalia i kërkoi Sulas të sqarojë më tej: “Pse ndodhi që mbas një ore nga deklarimi i zgjedhjeve u thanë fituesit?”, duke e lënë të hapur këtë dilemë për audiencën.