“Na i sollën rrobat me gjilpërat brenda” – Kujtimet e Vaso Shakës nga vitet e studimeve jashtë

Në një episod të emisionit “N’xhiro me Syçin”, gazetari Ilir Demalia kishte të ftuar një nga figurat më të shquara të basketbollit shqiptar, Vaso Shaka. Në një bisedë të çiltër dhe plot nostalgji, Shaka rrëfen vitet e tij të rinisë, kohën e studimeve jashtë vendit dhe kthimin e papritur për shkak të përplasjeve politike mes Shqipërisë dhe vendeve të kampit socialist.

 

“Në '61-­in u prishën marrëdhëniet...”, kujton Shaka, duke iu referuar krizës diplomatike që çoi në ndërprerjen e marrëdhënieve të Shqipërisë me kampin socialist. Ai shpjegon se ishte në prag të një periudhe shtatëvjeçare studimesh në Çekosllovaki, në një degë teknike: “Po do isha shtatë vjet atje, se isha për kimimetalurgjike”.

 

Gazetari Ilir Demalia ndërhyn për të sqaruar kontekstin politik të kohës, duke përmendur përplasjet që pasuan Konferencën e Moskës dhe largimin e Shqipërisë nga blloku komunist. Shaka saktëson se studentët shqiptarë nuk kishin dijeni për zhvillimet politike që po ndodhnin në prapaskenë:

“Ne nuk dinim gjë. U kthyem për pushim dhe pastaj na lajmëruan që s’do shkonim më.”

 

Kthimi i papritur la pasoja të pazakonta. Shumë studentë kishin lënë gjithçka në Çeki, përfshirë veshjet e përditshme dhe sendet personale. “Të gjitha i kishim lënë në Çeki... edhe gjilpërat që kishim lënë, na i kishin futur brenda kur na i sollën më vonë në shtator”, rrëfen me një buzëqeshje të lehtë Shaka.

 

Demalia e pyet për kujtimet nga ajo kohë, dhe Vaso Shaka nuk ngurron të flasë me nostalgji për qytetet dhe njerëzit:

“Praga është qytet shumë i bukur... Unë kam qenë në Bratislavë. Kalonim mirë. Edhe vajza të pashme kishte!”

Gazetari e ngacmon: “Ju që ishit djalë i pasur…”, ndërsa Shaka përgjigjet me një batutë që fton në reflektim: “Vajza të pashme ka gjithë bota. Po varet kë zgjedh!”

 

Ky rrëfim njerëzor, përtej sportit dhe sukseseve të tij në basketboll, sjell një panoramë të sinqertë të një brezi që është rritur mes ëndrrash për arsimim dhe përplasjeve të mëdha ideologjike. Me një ton të përzemërt dhe jo pak humor, Vaso Shaka nuk tregon vetëm historinë e tij, por edhe të një Shqipërie që kërkonte të lidhej me botën dhe më pas u izolua në mënyrë të papritur.