Kulla me deklaratë të fortë: Opozita bëri gjithçka për të humbur, po vazhdoi kështu do zhduket...

Në emisionin “N’xhiro me Syçin” me Ilir Demalia, analisti i njohur i sigurisë dhe çështjeve gjeopolitike, Ilir Kulla, bëri një analizë të ashpër të sjelljes së opozitës në zgjedhjet e fundit, duke e cilësuar fushatën e tyre si një vetë-shkatërrim.

Sipas Kullës, ndërsa Edi Rama zhvilloi një fushatë të qartë dhe të orientuar drejt grave, duke përfshirë aktivisht gratë në listat elektorale dhe komunikimin politik, opozita u tregua indiferente. “Berisha përveç një kafeje me gra në Rrogozhinë, nuk bëri asgjë,” u shpreh ai, duke nënvizuar mungesën e përfaqësimit të grave dhe të rinjve si simptomë e një politike të përjashtimit.

 

Kulla theksoi se opozita shpërdoroi shanset edhe përmes përzgjedhjes së dobët të kandidatëve. Ai solli si shembull rastin e Elbasanit, ku “Zoti Alizoti, nga Libohova, bëri një fushatë groteske në një territor që nuk e njihte”.

 

Sipas tij, nëse partitë e reja do ishin bashkuar në një pol të tretë, sot do kishin të paktën 15-17 mandate. “PS-ja ka rënë me 25 mijë vota, por ka fituar më shumë mandate sepse opozita nuk dëgjoi zërin e njerëzve,” theksoi Kulla.

 

Në përfundim, ai paralajmëroi se “nëse opozita vazhdon kështu, destinacioni i saj është zhdukja politike.”