Erion Braçe: Arta Dade dhe Mimi Kodheli nuk janë thjesht zonja, janë legjenda të politikës shqiptare

 Në një moment emocional dhe plot respekt gjatë emisionit “N’xhiro me Syçin” me Ilir Demaliajn, deputeti socialist Erion Braçe u ndal në figurat e Arta Dades dhe Mimi Kodhelit, të cilat i vlerësoi me superlativa që rrallë dëgjohen në diskursin politik shqiptar.

 

I pyetur për ndryshimet mes brezave të politikanëve në Partinë Socialiste, Braçe e ndërpreu me vendosmëri bashkëbiseduesin, duke theksuar se nuk bëhej fjalë për "zonja", por për diçka shumë më tepër. “Këto nuk janë zonja, këto janë legjenda,” tha ai me ton të prerë. “Zonja Dade është lart, shumë lart. Zonja Kodheli gjithashtu. Me Daden kemi bërë luftëra, jo beteja – luftëra të vërteta politike.”

 

Ky moment reflektoi jo vetëm respektin personal të Braçes për koleget e tij më me përvojë, por edhe një vlerësim të rrallë institucional për gratë që kanë lënë gjurmë në jetën politike të vendit. Arta Dade, e cila ka qenë ndër zërat më të fortë të Partisë Socialiste në periudha kritike, dhe Mimi Kodheli, ish-ministre e Mbrojtjes dhe një nga figurat më të rëndësishme të sigurisë kombëtare në dekadën e fundit, u vlerësuan nga Braçe jo vetëm për karrierën e tyre, por edhe për qëndrueshmërinë dhe integritetin në politikë. “Me Daden kemi pasur përplasje, por gjithmonë për ide, për parime. Ishin luftra që na rritën të gjithëve politikisht,” shtoi Braçe.