Trump për tarifën 50% mbi importet e bakrit: Kjo është epoka jonë e artë

Presidenti i SHBA-së, Donald Trump, ka njoftuar se një tarifë prej 50 për qind do të vendoset mbi importet e bakrit, duke filluar nga 1 gushti.

 

Përmes një postimi në rrjetin e tij social “Truth Social”, Trump shkroi: “Pas një vlerësimi të plotë të sigurisë kombëtare, po njoftoj një tarifë prej 50 për qind mbi bakrin, që do të hyjë në fuqi më 1 gusht.”

 

Kreu i Shtëpisë së Bardhë theksoi se bakri është një material thelbësor për prodhimin e gjysmëpërçuesve, avionëve, anijeve, municioneve, qendrave të të dhënave, baterive litium-jon, sistemeve të radarëve, sistemeve të mbrojtjes nga raketat dhe armëve hipersonike.

 

 

Sipas Trump, bakri është metali i dytë më i përdorur nga Departamenti Amerikan i Mbrojtjes.

 

Duke kritikuar ashpër administratën e Joe Biden-it, Trump tha: “Udhëheqës budallenj dhe letargjikë po e shkatërrojnë industrinë e bakrit.

 

Kjo tarifë prej 50 për qind do ta përmbysë sjelljen e pamatur dhe budallallëkun e administratës së Biden-it. SHBA-ja do të krijojë përsëri një industri dominuese të bakrit. Në fund të fundit, kjo është epoka jonë e artë.”