“Shqipëria bëhet” apo shpërbëhet? Shabani zbulon prapaskenat pas krizës së koalicionit me Lapajn

Në një intervistë për podcastin N’xhiro me Syçin, Endri Shabani, bashkëthemelues i nismës “Shqipëria Bëhet”, komentoi përçarjen e fundit në koalicionin që dikur premtonte 71 mandate dhe përfundoi me krizë legjitimiteti brenda listës së mbyllur.

 

Në qendër të debatit është kandidati Zeqir Kordhoni, i cili sipas Shabanit nuk ishte planifikuar për të qenë në listë, por u përfshi në moment të fundit për të plotësuar kuotën gjinore. "Kur kemi dorëzuar listën më 11 maj, ai nuk ishte aty. Por për shkak të rregullave për përfaqësimin gjinor, u fut për të mbushur boshllëkun," tha Shabani.

 

Kriza u thellua pas deklaratës publike të Adriatik Lapajt, që premtoi se “nëse marrim një mandat, unë nuk bëhem deputet.” Sot, situata është ndryshe: mandati mund t’i kalojë një kandidati që s’e ka dhënë dorëheqjen.

 

“Ka një keqkuptim. Të gjithë kandidatët kanë dorëzuar dorëheqjen, por KQZ nuk i ka shqyrtuar ende. Nëse nuk njihen, atëherë faji është institucional,” sqaroi Shabani.

 

Ai e quajti situatën “të panevojshme dhe të dëmshme për publikun”, por këmbënguli se zgjidhja kërkon integritet: “Kjo artific nuk ishte mashtrim, por kërkon që të gjithë të mbajnë fjalën.”