.png)
Biznesmeni dhe promotori i turizmit shqiptar, Gjergj Luca, ka publikuar një video mesazh nga Zvicra, ku shpreh admirimin për mënyrën se si ky vend alpin ka ruajtur traditën dhe autenticitetin, duke bërë një krahasim të drejtpërdrejtë me zonat malore shqiptare.
"Shikoni miqtë e mi se çfarë bëhet në këtë vend, ku unë
mendoj që malet nuk i ka aq të bukura sa është Dukagjini, sa është Malësia e
Madhe, sa është Vermoshi, sa është Thethi", shprehet Luca, ndërsa filmon
peizazhin alpin zviceran.
Ai thotë se prej dy ditësh ndodhet në një vizitë intensive në
një nga vendet më të shtrenjta në Zvicër, ku mbahen edhe samitet botërore, dhe
thekson se ndonëse ndodhen në një zonë elitare, banesat janë të thjeshta, të
ndërtuara me gurë dhe në përputhje me traditën lokale.
"Shtëpiat i kanë komplet me gurë. Ruajnë traditën e tyre.
Jo se s’kanë lekë, por ruajnë arkitekturën, të vjetrën, kullat, luginat,
malet," thotë ai, duke shtuar se “ne malet s’kemi pse t’i ruajmë, se ato
na i ka falur Zoti, por duhet të ruajmë mend kresë”.
Sipas Lucës, problemi qëndron te mungesa e vizionit dhe
përqendrimi te pamja e jashtme, jo përmbajtja. "Ne kemi shkatërruar çdo
gjë dhe merremi me formën, nuk merremi me përmbajtjen. Dhe përmbajtja është e
vërteta."
Në fund të mesazhit të tij, ai u bën thirrje shqiptarëve të
emigracionit që të kthehen dhe të investojnë në shtëpitë e tyre në zonat
malore, duke ruajtur traditën dhe promovuar “paketën e maleve” si një aset unik
që mund ta bëjë Shqipërinë një destinacion ndërkombëtar.
"Besojeni kësaj historie, kësaj pakete të maleve, që
është një gjenialitet. Ju që jeni në emigracion, që i kuptoni këto që them,
kthehuni nëpër kullat e juaja, rinovojini, bëjeni paketën e maleve! Ne e kemi
natyrën shumë më të bukur se këta, por nuk kemi mend si këta për ta ruajtur atë
vend."
“Miqtë e mi, mos u merrni me formën, por merruni me
përmbajtjen. Rrofsh Shqipëria, rrofshi ju që jeni në emigracion dhe
kthehuni!", shprehet në fund Luca.
No comments:
Post a Comment