Zamir Mati, piktor dhe pionier i balonave: Desha t’i sillja ngjyra qiellit shqiptar

Në episodin më të fundit të emisionit “N’xhiro me Syçin” nga Ilir Demalia, i ftuari i veçantë ishte Zamir Mati, piktor i njohur dhe pionier i balonave në Shqipëri, që prej vitit 1983. Sot, ai jeton në Francë, ku ka ngritur një shtëpi kulture shqiptaro-franceze, një urë simbolike mes dy vendeve që i ka dhënë frymë krijimtarisë së tij.

 

Demalia e nisi bisedën me përmendjen e 100-vjetorit të flotës detare shqiptare, që përkon me 25 gushtin, duke e lidhur më pas me figurën e Matit: “Sot kam të ftuar një mik të lagjes sonë, por edhe të familjes sime, Zamir Matin, bir i një oficeri të nderuar të asaj kohe, një personalitet me dashuri të jashtëzakonshme për vendlindjen dhe për Kosovën.”

 

Në përgjigje, Zamir Mati u shpreh me mirënjohje: “Faleminderit për ftesën, i dashur Ilir. Është kënaqësi të jem pjesë e këtij podkasti që sjell kujtesën e njerëzve dhe ngjarjeve me peshë.”

 

Pjesë nga biseda solli kujtime të rralla, ku Mati tregoi për iniciativën e tij të parë me balonat në Shqipëri, një ide që u realizua në vitin 1983, në një kohë kur kreativiteti përballej me kufizime të rënda. “Ishte një aventurë që lindi nga dëshira për të sjellë ngjyra në qiellin shqiptar, njëfarë shprese në një kohë të zymtë,” tha Mati.

 

Sot, përveç artit pamor, ai vazhdon të kontribuojë në përhapjen e kulturës shqiptare përmes shtëpisë së tij kulturore në Francë, duke promovuar identitetin tonë në një hapësirë ndërkombëtare.