Roland Bejko: Humbjet e PD-së gjithmonë janë justifikuar me vjedhje

I ftuar në emisionin “N’xhiro me Syçin” nga Ilir Demalia, Roland Bejko, ish-kandidat për kryetar të Bashkisë së Tiranës, foli mbi humbjen e thellë të opozitës në zgjedhjet lokale dhe mungesën e reflektimit nga lidershipi i Partisë Demokratike.

 

“Një distancë prej gati 300 mijë votash nuk mund të justifikohet vetëm me pretendimin për vjedhje,” u shpreh Bejko. Ai theksoi se nëse zgjedhjet janë manipuluar, opozita ka për detyrë t’i faktojë ato, duke i çuar materialet përkatëse në institucionet përkatëse dhe jo të veprojë vetëm mbi perceptime. “Tym në erë nuk është provë,” shtoi ai.

 

Duke iu referuar zgjedhjeve të vitit 2001, Bejko përmendi se ishte hera e vetme kur opozita arriti të provojë vjedhjet dhe të ketë pasoja politike konkrete. “Në atë kohë PD u organizua dhe strukturua. Materialet u çuan në Bruksel dhe kancelaritë perëndimore ndërhynë,” tha ai, duke kujtuar se kjo çoi në zgjedhjen e një presidenti konsensual dhe përfshirjen e opozitës në disa institucione të rëndësishme.

 

Bejko kritikoi përsëritjen e retorikës për zgjedhje të vjedhura sa herë që PD humbet: “Në 34 vite, Berisha gjithmonë ka dalë e ka thënë se ia kanë vjedhur zgjedhjet. Kjo strategji nuk mjafton më,” përfundoi ai.