Dimri i parë në Moskë: Alfred Moisiu rrëfen vitet e formimit ushtarak pas Luftës

 

Në episodin më të fundit të podcastit “N’xhiro me Syçin” nga Ilir Demalia, i ftuar është ish-Presidenti i Republikës së Shqipërisë, Alfred Moisiu. Një figurë që mishëron një kapitull të rëndësishëm të historisë shqiptare, Moisiu ndan me publikun kujtime të rralla nga rinia e tij dhe rrugëtimi i hershëm në ushtri pas përfundimit të Luftës së Dytë Botërore.

Në këtë rrëfim të sinqertë, ai tregon për vitet e para të formimit ushtarak, kur si 16-vjeçar në vitin 1946 shkoi për studime ushtarake në Bashkimin Sovjetik. Sfida e parë ishte gjuha – një sistem krejt i ndryshëm nga ajo çfarë shqiptarët njihnin deri atëherë – por me disiplinë dhe përkushtim, Moisiu arriti jo vetëm të mësonte rusishten, por edhe të lexonte letërsi në këtë gjuhë, duke kujtuar si lexim të parë librin “Si u kalit çeliku”.

Ai flet edhe për përplasjen mes jetës civile e asaj ushtarake, mungesën e kontakteve me familjen dhe vështirësitë klimatike, por edhe për disiplinën e fortë që përgatiti një brez të ri drejtuesish shqiptarë. Një episod që hedh dritë mbi një periudhë pak të njohur të formimit të elitave ushtarake të Shqipërisë pas luftës.