Çmimet e Festivalit të Filmit në Venecia: “Father Mother Sister Brother” i Jim Jarmusch fiton Luanin e Artë

Edicioni i 82-të i Festivalit Ndërkombëtar të Filmit në Venecia, një nga më të fuqishmit ndër vite, përfundoi me sukses të madh.

 

Deri në mbrëmjen e së shtunës, filmi i regjisores tuniziane Kaouther Ben Hania, The Voice of Hind Rajab, shihej si pretendent kryesor për Luanin e Artë. Drama e fuqishme e vendosur në Gaza, që tregon historinë e një vajze palestineze 6-vjeçare e cila kërkon ndihmë pasi forcat izraelite vranë familjen e saj, mori një ovacion 21-minutësh në premierën botërore — një nga më të gjatat në historinë e festivalit.

 

Megjithatë, filmi u vlerësua me Luani i Argjendtë – Çmimi i Madh i Jurisë, pra vendi i dytë.

“Ky çmim i dedikohet Gjysmëhënës së Kuqe Palestinë dhe të gjithë atyre që rrezikuan gjithçka për të shpëtuar jetë në Gaza. Ata janë heronjtë e vërtetë,” tha Ben Hania në fjalimin e saj prekës.

 

Ndërkohë, surpriza e festivalit doli të ishte triptiku delikat i Jim Jarmusch, Father Mother Sister Brother, i cili i solli ikonës së kinemasë indie amerikane Luanin e Artë të parë në karrierë. “Ne nuk bëjmë filma për garë, por e vlerësoj shumë këtë nderim të papritur,” tha Jarmusch. “Arti nuk ka pse të flasë drejtpërdrejt për politikë për të qenë politik — ai mund të krijojë empati dhe lidhje mes nesh.”

 

Filmi përbëhet nga tre histori të ndara, por të lidhura tematikisht, që eksplorojnë marrëdhëniet e ndërlikuara mes motrave, vëllezërve dhe prindërve. Në kast spikasin Tom Waits, Adam Driver, Mayim Bialik, Charlotte Rampling, Cate Blanchett, Vicky Krieps dhe Indya Moore.

 

Fitues të tjerë kryesorë:

 

Regjia më e mirë: Benny Safdie për The Smashing Machine, një biografi për MMA me Dwayne Johnson.

 

Aktorja më e mirë: Xin Zhilei për The Sun Rises on Us All të Cai Shangjun.

 

Aktori më i mirë: Toni Servillo për La Grazia të Paolo Sorrentino.

 

Skenari më i mirë: Valérie Donzelli dhe Gilles Marchand për At Work.

 

Në seksionin Orizzonti (Horizonte), i cili promovon tendencat e reja, u vlerësuan:

 

Filmi më i mirë: En El Camino i regjisorit meksikan David Pablos.

 

Aktorja më e mirë: Benedetta Porcaroli për The Kidnapping of Arabella.

 

Aktori më i mirë: Giacomo Covi për A Year of School.

 

Regjia më e mirë: Anuparna Roy për Songs of the Forgotten Trees.

 

Çmimi i Jurisë: Akio Fujimoto për Lost Land.

 

Gjithashtu, Werner Herzog mori një Luan të Artë për arritje në jetën artistike, i dorëzuar nga Francis Ford Coppola, ndërsa ceremonia përfundoi me një homazh të ndjerë për stilistin Giorgio Armani, i ndarë nga jeta në moshën 91-vjeçare.

 

Festivali i 2025-ës u zhvillua nga 27 gusht deri më 6 shtator.