Aulon Kalaja në “N’xhiro me Syçin”: Fitova primaret, por nuk më futën në listë, kjo është tallje

 Gazetari dhe kandidati i Partisë Demokratike, Aulon Kalaja, i ftuar në emisionin “N’xhiro me Syçin” të Ilir Demalias, ka hedhur akuza të forta për mënyrën si u trajtuan fituesit e primareve brenda PD-së, duke e konsideruar procesin si të deformuar dhe të përdorur për propagandë të brendshme.

 

Kalaja u shpreh se ndonëse kishte dalë më i votuari në primaret për bashkinë e Krujës dhe kishte fituar thellë në katër njësi administrative, nuk u fut në listë të sigurt për deputet. Ai e cilësoi këtë si “politikë klanore” dhe “tallje me njerëzit”:

 

“Unë fitova në Krujë, Fushë-Krujë, Thumanë dhe Bupq. Mora mbi 8120 vota dhe nuk jam deputet. Çfarë duhet të bëj më shumë për të hyrë në Parlament?”

 

Sipas Kalasë, nuk ishte vetëm ai i përjashtuar nga listat përkundër fitores në primare. Ai përmendi edhe raste të tjera si Jorida Tabaku, Ali Mehmeti dhe Hysen Kadiu, të cilët, sipas tij, fituan mbështetje në bazë por u lanë jashtë përzgjedhjes për deputetë.

 

Kalaja theksoi se kishte pranuar të garonte në lista të hapura për të testuar besimin e votuesve tek ai dhe për të kuptuar raportin e tij me politikën, por rezultati tregoi sipas tij se “sistemi është i deformuar”.

 

“Faktikisht, njerëz që kanë marrë më pak vota janë bërë deputetë. Pra, vota personale nuk vlen. Ky sistem favorizon emrat në listat e mbyllura dhe jo ata që kanë mbështetje reale.”

 

Në debat u preken edhe temat e aleancave dhe marrëdhënies me aleatët ndërkombëtarë. Kalaja kritikoi shpërndarjen e mandateve për parti të vogla si Lëvizja për Zhvillim Kombëtar dhe Partia për Drejtësi, duke thënë se nuk përfaqësojnë më forca të vërteta elektorale.