Lamtumirë Piro Milkani! Regjisori i njohur përcillet për në banesën e fundit

Piro Milkani, një nga kineastët e parë të kinematografisë shqiptare, mbylli sytë përgjithnjë të shtunën në mbrëmje në moshën 86-vjeçare.

 

“Iku babai, shoku dhe kolegu im”, shkroi djali i tij, Eno Milkani, në një postim në rrjetet sociale ku njoftoi ndarjen nga jeta të të atit, i cili u përcoll këtë mesditë në banesën e fundit.

 

Piro Milkani lindi më 9 dhjetor 1939 në qytetin e Korçës dhe qysh herët u dallua talenti i tij i rrallë në kinematografi. Pas studimeve në Akademinë e Arteve të Bukura në Pragë, u kthye në Shqipëri, ku nisi punë në Kinostudion “Shqipëria e Re”, fillimisht si operator dhe më pas si regjisor, ku la gjurmë të thella në historinë e filmit shqiptar me mbi 20 filma e dokumentarë, ku pasqyronte realitetin e shoqërisë dhe reflektonte kritikat për problemet e kohës, duke i dhënë filmit shqiptar dimensione njerëzore, psikologjike dhe shoqërore,

 

Filma si “Trishtimi i zonjës Shnajder”, “Kur zbardhi një ditë”, “Zonja nga qyteti”, “Ballë për ballë”, Shtigje lifte, Ngadhënjim mbi vdekje mbajnë vulën e regjisë së tij.

 

Për Piro Milkanin, kinematografia ishte pasion dhe mënyrë e të jetuarit, ndaj nuk reshti asnjëherë së kontribuari, përfshirë pedagogjinë, duke ndihmuar në formimin e brezave të rinj të kineastëve shqiptarë, drejtimin e institucioneve kulturore dhe organizimin e festivaleve të filmit.

 

Ai u nderua me tituj dhe çmime të shumta, përfshirë titullin “Artist i Popullit” dhe medaljen “Ambasador i Filmit Shqiptar”.