“Gaz Demi ringjalli Partizanin nga hiçi” – Eduard Prodani: Investoi vetëm me xhepin e vet

Në një episod të fundit të emisionit “N'xhiro me Syçin”, moderuar nga Ilir Demalia, ish-sekretari i Federatës Shqiptare të Futbollit dhe ish-drejtori i Partizanit, Eduard Prodani, ndau një rrëfim të detajuar mbi ringritjen e klubit legjendar pas rrënimit total. Sipas Prodanit, Partizani, dikur një perandori sportesh, kishte mbetur vetëm me një stemë dhe pa asnjë infrastrukturë funksionale, derisa presidenti Gaz Demi vendosi ta rimerrte në dorë fatin e tij.

 

“E mori klubin nga hiçi. Kishte mbetur vetëm një stemë dhe sot kemi një kompleks sportiv modern. Kjo është për t’u vlerësuar,” deklaroi Prodani. Ai theksoi se investimi ka qenë plotësisht privat dhe jo i subvencionuar nga shteti. “Qeveria s’ka dhënë asnjë lek, përveçse i ka dhënë truallin. Ai ka futur para nga xhepi dhe kjo duhet thënë.” Në diskutim me Demalian, u prekën dhe temat e shpërbërjes së sporteve të tjera që përbënin Partizanin – nga volejbolli e basketbolli, te atletika dhe mundja – duke ngritur shqetësimin për mungesën e infrastrukturës sportive në Shqipëri.

 

“Komunizmi e kuptonte rëndësinë e sportit. Sot nuk kemi as fusha, as salla. Është turp,” shtoi Demalia. Por në fund, të dy ranë dakord: pa kontributin e Demi-t, emri “Partizani” mund të kishte humbur në histori. “Brendi nuk blihet me lekë,” tha Prodani.