Erion Braçe: Pse shqiptarët duhet t’i japin PS-së mandatin e katërt

 Në prag të zgjedhjeve parlamentare, kandidati për deputet i Partisë Socialiste, Erion Braçe, ishte i ftuar në emisionin “N’xhiro me Syçin” nga Ilir Demalia, ku shpalosi arsyet pse, sipas tij, qytetarët shqiptarë duhet t’i japin mandatin e katërt qeverisë socialiste. Braçe theksoi se është e rëndësishme të bëhet dallimi mes partisë dhe qeverisë. Sipas tij, edhe brenda një qeverie socialiste, individë të caktuar si ministra, zëvendësministra apo drejtues të administratës mund të mos e meritojnë të jenë pjesë e qeverisjes së ardhshme. Prandaj, ai theksoi nevojën për reflektim të vazhdueshëm dhe përmirësim të vetes.

 

“Problemi ynë është të ndryshojmë veten kohë pas kohe, të përshtatemi me kërkesat e qytetarëve dhe të korrigjojmë gabimet tona,” u shpreh Braçe. Ai argumentoi se Partia Socialiste e meriton mandatin e katërt për tri arsye kryesore: transformimi i vendit gjatë 12 viteve të fundit, nevoja për të çuar përpara dhe përmirësuar punën e nisur, si dhe mbrojtja e arritjeve, sidomos në drejtësi. Në këtë kontekst, Braçe theksoi rëndësinë e reformës në drejtësi dhe mbështetjen ndaj saj, pavarësisht kritikave që mund të kenë ekzistuar edhe nga brenda vetë PS-së. “Është thelbësore që drejtësia – qoftë penale, civile apo sociale – të instalohet plotësisht në këtë vend,” tha ai. Ai u shpreh kundër çdo sulmi politik ndaj sistemit të drejtësisë dhe theksoi se prokurorët dhe gjyqtarët duhet të jenë përgjegjës vetëm përpara institucioneve kushtetuese.

 

Duke folur për luftën kundër korrupsionit, Braçe nënvizoi se Partia Socialiste është e vetmja forcë politike që ka hequr mbrojtjen politike për të akuzuar brenda saj, duke i lënë ata përballë drejtësisë. “Tregoni një rast në 35 vitet e fundit kur një parti në pushtet ka goditur korrupsionin brenda vetes,” u shpreh ai. Në fund, Braçe përmendi edhe çeljen e negociatave me Bashkimin Evropian si një tjetër argument të fortë për të mbështetur PS-në në këto zgjedhje, duke e quajtur këtë proces si një nga më të rëndësishmit për të ardhmen e vendit.